सिन्धुली । नेपाली राजनीतिमा अक्सर आरोप–प्रत्यारोप, व्यक्तिगत गालीगलौजको खेती हुने गर्छ। तर, सिन्धुली निर्वाचन क्षेत्र नम्बर १ मा भने यसपटक चुनावी माहोल फरक र निकै मर्यादित देखिएको छ।

यहाँका दुई मुख्य प्रतिस्पर्धीबीचको चुनावी भिडन्त केवल सत्ताका लागि लडाइँ मात्र नभएर वर्षौँ पुरानो मित्रता र लोकतान्त्रिक संस्कारको एउटा सुन्दर नमुना बनेको छ।

जनकपुरदेखि सिन्धुलीसम्मको यात्रा
यी दुई मुख्य प्रतिस्पर्धीहरूको सम्बन्ध हिजोआजको होइन। जनकपुरमा उच्च शिक्षा अध्ययन गर्दादेखि नै उनीहरू एउटै परिवेशमा हुर्किएका समकालीन मित्र हुन्। विद्यार्थी जीवनमा एउटै क्याम्पसका कक्षाकोठामा सँगै बसेर शैक्षिक र वैचारिक बहस गर्ने यी दुई साथी अहिले सिन्धुली–१ को राजनीतिक मैदानमा आमनेसामने छन्।

समयको चक्रसँगै उनीहरूले फरक–फरक राजनीतिक यात्रा तय गरे। आज एउटाले नेपाली कांग्रेसको झण्डा बोकेका छन् भने अर्कोले नेकपा एमालेको। वैचारिक कित्ता फरक भए पनि उनीहरूको कार्यशैलीमा भने त्यही पुरानो मित्रताको सुगन्ध भेटिन्छ। सार्वजनिक मञ्चहरूमा एकअर्काको खेदो खन्नुको सट्टा उनीहरू आ–आफ्ना एजेन्डा र विकासका खाका प्रस्तुत गर्न व्यस्त छन्।

प्रदिपको बलियो विरासत र ‘कामको राजनीति’
यसपटकको चुनावी माहोललाई सूक्ष्म ढंगले नियाल्दा प्रदिप कटुवालको पक्षमा जनलहर केही सकारात्मक र बलियो देखिन्छ। यसको मुख्य कारण उनको विगतको ‘ट्र्याक रेकर्ड’ हो। प्रदिपले यसअघि नै सिन्धुलीको विकासका लागि धेरै आयोजनाहरूको पहलकदमी लिएर आफूलाई परीक्षण गरिसकेका छन्।

विशेष गरी बागमती प्रदेशको स्वास्थ्य मन्त्री हुँदा उनले गरेको कामले अहिले मतदातामाझ राम्रो छाप छोडेको छ। जिल्लाका अस्पतालहरूको स्तरोन्नति, स्वास्थ्य सेवामा सर्वसाधारणको पहुँच र कोभिड–१९ को समयमा उनले खेलेको सक्रिय भूमिकालाई स्थानीयले अझै बिर्सिएका छैनन्। उनले गरेका कामको जग नै अहिले उनको चुनावी प्रचारको मुख्य हतियार बनेको छ। मतदाता भन्छन्, “जसले काम गरेर देखाएको छ, उसैलाई फेरि अवसर दिनुपर्छ।”

कांग्रेस र एमालेबीचको कडा टक्कर
सिन्धुली–१ मा यसपटक अरू कुनै दल वा स्वतन्त्र उम्मेदवारको चर्चा खासै सुनिँदैन। नयाँ शक्तिका रूपमा उदाएको राष्ट्रिय स्वतन्त्र पार्टी (रास्वपा) लगायतका दलहरूको उपस्थिति यहाँ नगन्य जस्तै छ। यहाँको भिडन्त विशुद्ध रूपमा दुई ठूला दल कांग्रेस र एमालेकै वरिपरि घुमेको छ।

यो प्रतिस्पर्धा जति कडा छ, त्यति नै रमाइलो र रोचक पनि छ। एकातिर कांग्रेसको आफ्नो बलियो संगठन र विरासत छ भने अर्कोतिर एमालेको सुदृढ सांगठनिक संरचना र प्रदिपको व्यक्तिगत प्रभाव छ। दुवै पक्षका कार्यकर्ताहरू संयमित भएर आ–आफ्नो उम्मेदवार जिताउन लागेका छन्, जसले गर्दा सिन्धुली–१ अहिले देशकै सबैभन्दा मर्यादित चुनावी क्षेत्रको रूपमा चर्चामा छ।

राजनीतिको मैदानमा प्रतिस्पर्धी हुनुको अर्थ शत्रु हुनु होइन भन्ने सन्देश यी दुई मित्रले दिएका छन्। व्यक्तिगत टीका–टिप्पणी भन्दा माथि उठेर विकासका योजना र नीतिको कुरा गर्नुले स्थानीय बासिन्दामा पनि उत्साह थपेको छ।

“हामीले अरू ठाउँमा झगडा र गाली मात्र सुन्यौँ, तर यहाँ त दुवै उम्मेदवारले एकअर्कालाई सम्मान गर्दै आफ्ना योजना सुनाइरहेका छन्,” स्थानीय एक मतदाता भन्छन्, “यस्तो संस्कारले मात्रै लोकतन्त्र बलियो हुन्छ।”

सिन्धुली–१ को यो निर्वाचनले चुनावी परिणाम जे जस्तो ल्याए पनि एउटा कुरा भने प्रष्ट पारेको छ, राजनीतिमा निष्ठा र मित्रता सँगसँगै जान सक्छन्। प्रदिपको काम गर्ने शैली र दुई मित्रबीचको यो स्वच्छ प्रतिस्पर्धाले सिन्धुलीको चुनावी इतिहासमा एउटा नयाँ र सुनौलो अध्याय थपेको छ।