बेइजिङ । चिनियाँ नागरिक पत्रकारलाई वुहानमा कोरोना भाइरससम्बन्धी रिपोर्टिङमा संलग्‍न भएको भन्दै जेल सजाय तोकिएको छ । पत्रकार जाङ जानलाई कोरोना भाइरसको प्रकोप देखिएको भन्दै रिपोर्टिङ गरेकी थिइन् ।

उनलाई गत मेमा प्रहरीले नियन्त्रणका लिएको थियो । गलत सूचना फैलाएको आरोपमा ३७ वर्षीय उनलाई पाँच वर्षको जेल सजायसमेत तोकिएको छ ।

पूर्व अधिवक्तासमेत रहेकी उनले प्रकोपबारे रिपोर्टिङ गरेपछि ६ महिनाअघि पक्राउ परेकी थिइन् । उनलाई सांघाईस्थित एक नजरबन्दमा राखिएको थियो ।

उनीमाथि “भ्रम फैलाउने र समस्या निम्त्याउन” भूमिका खेलेको आरोप लगाइएको थियो, उनी सामाजिक सञ्‍जाल र स्ट्रिमिङ अकाउन्टमार्फत प्रकोपबारे रपोर्टिङ गर्ने गरेकी थिइन् । उनी चीनको आलोचक र सामाजिक अभियन्तासमेत हुन् ।

सोमबार प्रकाशित अभियोगपत्र अनुसार झाङले इन्टरनेटमार्फत सामाजिक सञ्‍जाल विच्याट, ट्विटर र युट्युवमा भिडियो र टेक्सका माध्यमबाट गलत सूचना फैलाएको आरोप लगाइएको छ ।

“उनले विदेशी मिडिया फ्रि रेडियो एशिया र इपोच टाइम्ससँगको अन्तर्वार्तामा पनि वुहानको कोरोना भाइरसको संक्रमणले महामारीको रुप लिने बताएकी थिइन् ।

उनलाई हङकङका प्रदर्शनकारीहरुलाई समर्थन गरेको भन्दै सन् २०१८ र सन् २०१९ मा पनि चिनियाँ अधिकारीहरुले नियन्त्रणमा लिएका थिए । त्यस समय पनि उनलाई दुई महिना भन्दा बढी समयसम्म हिरासतमा राखिएको थियो र मानसिक यातना दिइएको चिनियाँ मानवअधिकारवादी संस्था सीएचआरडीले जनाएको छ ।