Logo

बागमती पेज

जेष्ठ ३१, २०७८ सोमबार

कांग्रेस नेता खतिवडाले पठाए स्वास्थ्य कार्यालय ओखलढुंगालाई अक्सिजन सिलिन्डर


काठमाडौं । नेपाली कांग्रेसका नेता रामहरि खतिवडाले स्वास्थ्य कार्यालय ओखलढुंगालाई अक्सिजन सिलिन्डर पठाएका छन् ।

कोरोना रोकथाम र नियन्त्रणमा फ्रन्टलाइनमै खटिएका नेता खतिवडाले आइतबार रुम्जाटारस्थित स्वास्थ्य कार्यालयलाई ६ थान अक्सिजन सिलिन्डर पठाएका हुन् ।

उनले काठमाडौंबाटै व्यक्तिगत खर्चमा अक्सिजन सिलिन्डर पठाएका हुन् । सिलिन्डरसँगै उनले अन्य स्वास्थ्य सामग्री पनि पठाएका छन् । नेता खतिवडाकै सक्रियतामा ओखलढुंगामा कोरोना परीक्षण गर्न पिसिआर मेसिन पनि खरिद भई स्थापना भइसकेको छ ।

स्वास्थ्य मन्त्रालय, स्वास्थ्य विभाग पुगेर जिल्लामा स्वास्थ्य सामग्री लैजान, पिसिआर मेसिन पठाउन ताकेता गर्दै आएका खतिवडाले व्यक्तिगत रूपमा पनि लाखौं मूल्यका स्वास्थ्य सामग्री ओखलढुंगा लगिरहेका छन् ।

यसअघि उनले खिजिदेम्बा गाउँपालिका अध्यक्ष वेदबहादुर रोक्कालाई गाउँपालिकाका नौ वडामा नौ हजार मास्क र ४५ लिटर स्यानिटाइजर हस्तान्तरण गरेका थिए। ती सबै सामग्री उनले काठमाडौंबाट लिएर गएका हुन् ।