काठमाडौं । मंगोलियाको साइन नोमुन बौद्ध गुम्बाका प्रमुख अभिवादनकर्ता डा. साइनबुयान नर्गुई हाल नेपाल भ्रमणमा छन्। आफ्नो भ्रमणका क्रममा उनले लुम्बिनी विकास कोष र लुम्बिनी बौद्ध विश्वविद्यालयसँग सहकार्य गर्दै अतिथि प्राध्यापकका रूपमा कार्यरत रहेको जानकारी दिए।
हाम्रो विशेष अन्तर्वार्ताका क्रममा डा. नर्गुईले भने, “यो भ्रमणको मुख्य उद्देश्य नेपाल र मंगोलियाबीच धार्मिक तथा सांस्कृतिक पर्यटन विकासमा योगदान गर्नु हो। नेपाल र मंगोलिया दुवै देशबीचको सम्बन्ध पुरानो ऐतिहासिक पृष्ठभूमिमा आधारित छ। मंगोलियाले २२०० वर्षअघि बौद्ध धर्म स्वीकार गरेको इतिहास छ, र नेपालबाटै बौद्ध धर्मलाई पहिलो पटक आत्मसात् गर्दै फैलाएको हाम्रो ऐतिहासिक सम्बन्धको प्रमाण हो। त्यसैले, यो ऐतिहासिक सम्बन्धलाई सुरक्षित राख्दै अझ विस्तार गर्न आवश्यक छ।”
हालै मंगोलियाका डा. नर्गुईले नेपालका प्रधानमन्त्री केपी शर्मा ओलीसँग भेटवार्ता गरेका छन्। सो भेटवार्ताका बारेमा उनले भने, “प्रधानमन्त्री ओलीसँग मेरो दुई पटक भेट भएको छ। हामीले नेपाल र मंगोलियाबीच धार्मिक तथा सांस्कृतिक सम्बन्ध विस्तारबारे छलफल गर्यौं। मैले मंगोलियाका सरकारको तर्फबाट प्रधानमन्त्री ओलीलाई औपचारिक निमन्त्रणा पनि प्रदान गरे। प्रधानमन्त्री ओली आगामी गर्मी याममा मंगोलिया भ्रमणको योजना बनाउनुभएको जानकारी पाएको छु।”
उनले लुम्बिनी पार्कमा मंगोलियन मन्दिर निर्माण र मंगोलियामा लुम्बिनी बौद्ध परियोजनाबारे पनि छलफल भएको बताए। प्रधानमन्त्री ओलीले नेपाल सरकारले मंगोलियासँग धार्मिक तथा सांस्कृतिक पर्यटन विकासमा विशेष चासो राखेको बताए।
डा. नर्गुईले यो वर्षको बुद्ध जयन्तीका अवसरमा मंगोलियाबाट धार्मिक तथा सांस्कृतिक व्यक्तित्व, विद्वान, र भिक्षुहरूलाई नेपालमा आमन्त्रित गर्न प्रधानमन्त्री ओलीले औपचारिक प्रस्ताव गरेको जानकारी पनि दिए। उनले भने, “प्रधानमन्त्रीको यो प्रस्ताव दुई देशबीचको सहयोग विस्तारको संकेत हो। भविष्यमा नेपाल र मंगोलियाबीच धार्मिक तथा सांस्कृतिक सम्बन्ध अझ मजबुत हुनेमा म विश्वस्त छु।”
अन्त्यमा, उनले नेपाली जनतालाई आफ्नो तर्फबाट स्वास्थ्य र समृद्धिको कामना गर्दै धन्यवाद व्यक्त गरे।
प्रतिक्रिया दिनुहोस्