१६ सयले उकालो लाग्दै सुनको भाउले बनायो नयाँ ऐतिहासिक रेकर्ड

काठमाडौँ, आइतबार — नेपाली बजारमा आइतबार सुनको मूल्य ह्वात्तै बढ्दै नयाँ रेकर्ड कायम गरेको छ। शुक्रबारको तुलनामा आज प्रतितोला १६ सय रुपैयाँले वृद्धि भएसँगै मूल्य हालसम्मकै उच्च स्तरमा पुगेको हो।

नेपाल सुनचाँदी व्यवसायी महासंघका अनुसार शुक्रबार २ लाख ५० हजार ६ सय रुपैयाँमा कारोबार भएको छापावाला सुन आइतबार २ लाख ५२ हजार २ सय रुपैयाँ पुगेको छ। यो मूल्य नेपाली बजार इतिहासकै सबैभन्दा महँगो दर मानिएको छ।

यतिबेला अन्तर्राष्ट्रिय बजारमा समेत सुनको मूल्यमा निरन्तर उतार–चढाव भइरहेकाले यसको प्रभाव घरेलु बजारमा तीव्र रूपमा देखिएको व्यापारीहरूको भनाइ छ।

त्यस्तै, चाँदीको मूल्य पनि उकालो लाग्दै प्रतितोला ४५ रुपैयाँले बढेर ३,४९० रुपैयाँमा कारोबार हुने महासंघले जनाएको छ।