काठमाडौं । मानेभञ्ज्याङको हिलेपानीमा जब दुई प्रमुख प्रतिस्पर्धी नेपाली कांग्रेसका कुमार लुइँटेल र नेकपा (एमाले) की अस्मिता थापा आमने-सामने भए, तब त्यहाँको दृश्य कुनै फिल्मी ‘क्लाइमेक्स’ भन्दा कम थिएन।

हात मिलाउँदा दुवैको अनुहारमा मुस्कान थियो, अनि कुराकानीको केन्द्रमा थियो ओखलढुंगाको विकास। ओखलढुंगाको आकाशमा अहिले चुनावी बादल मडारिरहेको छ, तर यो बादलबाट गालीको वर्षा होइन, संस्कारको शितल लहर चलिरहेको छ।

चुनावी र्‍याली र घरदैलोको चटारोबीच आमनेसामने भएका यी दुई प्रतिस्पर्धीले एक-अर्कालाई देख्नेबित्तिकै तिखो कटाक्ष गरेनन्, बरु न्यानो मुस्कानसहित हात मिलाए। निर्वाचनको रस्साकस्सी एकातिर पन्छाउँदै उनीहरूले एक-अर्कालाई अगामी जितका लागि अग्रिम शुभकामना समेत साटासाट गरे।

नयाँ अनुहार, नयाँ जोस: रोमाञ्चक भिडन्त
यो पटक ओखलढुंगाले जसलाई जिताए पनि संसदमा एउटा ‘नयाँ अनुहार’ पुग्ने पक्का छ। पुराना राजनीतिक खेलाडीहरूलाई विश्राम दिँदै मैदानमा उत्रिएका लुइँटेल र थापा दुवैका आ-आफ्नै विरासत र शक्ति छन्। कांग्रेसका तर्फबाट शालिन व्यक्तित्वका धनी कुमार लुइँटेल र एमालेकी ‘जेन-जी’ (Gen Z) पुस्ताकी प्रतिनिधि अस्मिता थापाबीचको यो भिडन्त निकै रोमाञ्चक र उत्साहजनक बनेको छ।

अस्मिताको टिकट: देशैभर खुसी, जिल्लामा तरंग
जब नेकपा (एमाले) ले धेरै पुराना र सक्षम हस्तीहरूलाई थाती राख्दै युवा नेत्री अस्मिता थापालाई टिकट दियो, तब देशैभरि एउटा सकारात्मक सन्देश गयो। “एमालेले युवालाई विश्वास गर्‍यो” भन्दै सामाजिक सञ्जालमा खुसीयाली छायो। तर, यो निर्णयको पराकम्प जिल्लाभित्र भने अलि फरक देखियो।

वर्षौंदेखि पार्टीमा रगत-पसिना बगाएका नेताहरूलाई पाखा लगाएर ‘जेन-जी’ पुस्तालाई अघि सारेपछि ओखलढुंगा एमालेभित्र केही समय निराशाको छाया देखियो। यही असन्तुष्टिको फाइदा उठाउँदै र टिकट वितरणमा असहमति जनाउँदै धेरै पुराना नेता र कार्यकर्ताहरूले एमाले परित्याग गरी नेकपा प्रवेश गरे, जसले जिल्लाको चुनावी गणितलाई केही हदसम्म तरंगित बनाइदिएको छ।

पार्टीभित्रको आन्तरिक कलह र टुटफुटका बाबजुद, मैदानमा एकजना शक्तिशाली महिला उम्मेदवार पाउँदा सिङ्गो ओखलढुंगामा चुनावी उत्साह भने घटेको छैन। “अस्मिता थापा जस्तो जुझारु युवा र कुमार लुइँटेल जस्तो बौद्धिक व्यक्तित्वबीचको प्रतिस्पर्धाले जिल्लालाई नयाँ दिशा दिनेछ,” हिलेपानीमा भेटिएका एक मतदाताले भने।

अस्मिता र कुमारबीचको त्यो सौहार्दपूर्ण भलाकुसारीले के पुष्टि गरेको छ भने राजनीति विचारको लडाइँ हो, व्यक्तिगत दुश्मनी होइन। दुवै उम्मेदवारले जनताको मन जित्न नयाँ भिजन र एजेन्डाहरू पस्किएका छन्।

ओखलढुंगाको यो निर्वाचन केवल हार र जितको कथा मात्र होइन; यो त पुराना अनुभवी र नयाँ जोसबीचको सुन्दर सन्तुलनको खोजी पनि हो। कांग्रेस र एमालेबीचको यो रोमाञ्चक प्रतिस्पर्धाले फागुनको जाडोमा पनि ओखलढुंगालाई तताइदिएको छ।