काठमाडौँ। राजनीतिमा युवाहरूको अर्थपूर्ण सहभागिता मात्र होइन, नेतृत्व नै सुम्पिनुपर्छ भन्ने बहस चलिरहँदा नेकपा एमालेले ओखलढुंगामा एक थान ‘आशाको दियो’ बालेको छ। ३० वर्षको कलिलो उमेरमै प्रतिनिधिसभा सदस्यको उम्मेदवार बनेकी अस्मिता थापा यतिबेला जिल्लाकै सर्वाधिक चर्चाको पात्र बनेकी छन्। लिखु गाउँपालिकाको उपाध्यक्ष हुँदा देखाएको कार्यकुशलता र विकासप्रतिको हुटहुटीले उनलाई केवल एउटा पार्टीको उम्मेदवार मात्र होइन, ओखलढुंगाकै साझा भरोसाका रूपमा स्थापित गरेको छ।

अस्मिताको उम्मेदवारीलाई धेरैले ‘सरप्राइज’ माने पनि उनको राजनीतिक उचाइ आकस्मिक मात्र छैन। विद्यार्थी राजनीतिदेखि नै खारिएकी उनी त्रिभुवन विश्वविद्यालयबाट स्नातकोत्तर गर्दै गरेकी बौद्धिक युवा हुन्। पालिका उपाध्यक्ष रहँदा उनले सञ्चालन गरेको ‘महिला उद्यमशीलता टोल-टोलमा’ कार्यक्रमले सयौं महिलाहरूलाई स्वरोजगार बनाएको छ। गाउँका कुना-कप्चा पुगेर जनताको पीर-मर्का सुन्ने र समाधान खोज्ने उनको स्वभावले नै उनलाई आज प्रतिनिधिसभाको ढोका ढकढक्याउने हिम्मत दिएको हो।

अस्मिताको अर्को बलियो पक्ष भनेको अनुभवी नेतृत्वको साथ र युवा जोशको फ्युजन हो। ओखलढुंगामा एमालेका मियो मानिने पूर्वसांसद यज्ञराज सुनुवार आफैं उनको चुनावी कमान्डर बनेर मैदानमा खटिएका छन्। “अनुभवको मार्गदर्शन र युवाको गति” भन्ने नाराका साथ चुनावी मैदानमा रहेकी अस्मिताले जिल्लाका अधुरा विकासका योजनालाई पूर्णता दिने र युवा पलायन रोक्ने एजेन्डालाई प्राथमिकता दिएकी छन्। उनी भन्छिन्, “मैले नेतृत्वको विश्वास त जितेकै छु, अब जनताको विश्वास जितेर ओखलढुंगाको मुहार फेर्ने संकल्प बोकेकी छु।”

यद्यपि, राजनीति सधैं सोझो रेखामा हिँड्दैन। पार्टीभित्रका केही आन्तरिक चुनौती र प्रतिस्पर्धीहरूको घेराबन्दीलाई तोड्नु उनका लागि कठिन त छ, तर असम्भव छैन। विशेषगरी महिला, युवा र विद्यार्थी वृत्तमा उनको राम्रो पकड छ। जिल्लाकै इतिहासमा प्रमुख दलबाट एक्लो महिला उम्मेदवार हुनुले पनि उनलाई थप सहानुभूति र समर्थन प्राप्त हुने देखिन्छ। पुरानो पुस्ताका नेताहरूले ओगटेको क्षेत्रमा अस्मिताको उपस्थितिले परिवर्तनको चाहना राख्ने मतदाताहरूलाई उत्साहित बनाएको छ।

अस्मिता थापा केवल एउटा नाम मात्र होइनन्, उनी ओखलढुंगाको राजनीतिमा आएको नयाँ र सकारात्मक तरङ्ग हुन्। यदि उनले यो निर्वाचनमा बाजी मारिन् भने, नेपालको संसदीय इतिहासमै सबैभन्दा कम उमेरको सांसद बन्ने गौरव प्राप्त गर्नेछिन्। उनको जितले राजनीतिमा आउन चाहने हजारौं युवाहरूका लागि ढोका खोल्नेछ र ओखलढुंगाले एक ऊर्जावान् जनप्रतिनिधि पाउने निश्चित छ।