काठमाडौं । नेपाल पत्रकार महासंघ उपत्यका प्रदेश समितिको आयोजना तथा बुढानीलकण्ठ नगरपालिकाको समन्वयमा स्थानीय सरकारको सञ्चार नीति सम्बन्धी ‘मेयरसँग पत्रकार महासंघ’ विषयक अन्तरक्रिया कार्यक्रम सम्पन्न भएको छ ।

नगरपालिकाको कार्यालय हात्तिगौडा काठमाडौंमा सोमबार आयोजित कार्यक्रममा स्थानीय सरकारले सूचना र सञ्चार सम्बन्धी गरिरहेका अभ्यास, गर्नसक्ने विषयहरुको समिक्षा तथा संविधान र कानुनले दिएको अधिकार र त्यसको कार्यान्वयनका विविध विषयमा छलफल भएको हो ।

कार्यक्रममा सम्बोधन गर्दै नगर प्रमुख मिठाराम अधिकारीले पत्रकारहरु आचारसंहिता अनुसार चल्नुपर्नेमा जोड दिए । उनले विगतको तुलनामा अहिले विकास निर्माणसहित विभिन्न क्षेत्रमा धेरै सुधार भएको जनाउँदै मिडियाले कलम चलाउँदा हिजोको परिवर्तन र अहिलेको परिवर्तनको तुलना गरेर समाजमा सकरात्मक सूचना प्रवाह गर्न आवश्यक रहेको बताए ।

सञ्चार सम्बन्धी नीतिको छलफलप्रति उनले कार्यक्रम उपयोगी र प्रभावकारी भएको उल्लेख गर्दै सुरुवाती चरणमा नै यस्ता कार्यक्रम गर्न सकेको भए अझै प्रभावकारी हुने धारणा राखे ।

नेपाल पत्रकार महासंघका महासचिव राम प्रसाद दाहालले सञ्चार सम्बन्धी नीतिहरु बनाउँदा संविधानको मर्म र भावना विपरित हुने गरी बनाउन नहुने बताए । उनले कार्यक्रममा उठेका विषयलाई केन्द्रित हुँदै निक्कै महत्वपूर्ण विषयमा छलफल भएको र यस्ता कार्यक्रमहरुलाई अझै प्रभावकारी बनाउँदै लैजानुपर्ने बताए ।
उपप्रमुख अनिता लामाले मिडियाले कसैलाई पनि देवत्वकरण नगरी सत्य कुरा मात्र सम्प्रेषण गर्नुपर्ने बताइन् । जनप्रतिनिधीहरु रातदिन नभनी सेवाग्राहीको लागी खटिरहेको भन्दै उनले पुल र त्रिशुल दुवै बनिदिन पत्रकारहरुलाई आग्रह समेत गरिरन् ।

प्रमुख कार्यकारी अधिकृत अजय बर्तौलाले मिडियाले नकरात्मक विषयलाई मात्र उठाउने गरेको उल्लेख गर्दै सकरात्मक विषयलाई पनि प्राथमिकता दिनुपर्ने बताए ।
बरिष्ठ पत्रकार तथा प्रेस काउन्सिल नेपालका पूर्व कार्यबाहक अध्यक्ष गोपाल बुढाथोकीले स्थानीय सरकारहरु पारदर्शी, सञ्चारमैत्री र विकासमैत्री हुन आवश्यक रहेको बताए ।

उनले नगरपालिकाले विकासका काममा गति दिएर र छिटो छरितो सेवा सुविधा प्रदान गरेर नगरबासीलाई नगरबासी भएको महसुस गराउन आवश्यक रहेको औंल्याए ।

कार्यक्रमका अध्यक्ष समेत गरिरहेका उपत्यका प्रदेश समितिका अध्यक्ष टेनिस रोकाले स्थानीय सरकारले नीति नै बनाएर भ्रामक सूचना सचेतना सम्बन्धी कार्यक्रम, सूचनाको हकको कार्यान्वयन लगायतका विषयहरु सञ्चालन गर्न सुझाव दिए । उनले यस्ता कार्यक्रम विद्यालयमा लक्षित गर्नु आवश्यकता रहेको औंल्याए ।

कार्यक्रममा नगरपालिकाको प्रमुख अधिकारी, उपप्रमुख लामा, प्रमुख प्रशासकिय अधिकृत बर्तौला, नेपाल पत्रकार महासंघका महासचिव रामप्रसाद दाहाल, बरिष्ठ पत्रकार तथा प्रेस काउन्सिल नेपालका पूर्व कार्यबाहक अध्यक्षबुढाथोकी, प्रेस चौतारी नेपालका बरिष्ठ नेता विश्वमणी सुवेदी, नेपाल पत्रकार महासंघका केन्द्रीय सदस्य अर्जुन पन्त, प्रेस सेन्टर नेपालका केन्द्रिय सदस्य सागर पन्त, बरिष्ठ पत्रकार बालकुमार नेपाल, पत्रकार महासंघ उपत्यका प्रदेश र काठमाडौं शाखाका कार्यसमितिका पदाधिकारी तथा सदस्यहरु, नगर कार्यपालिका सदस्यहरु, स्थानीय मिडियाका सम्पादक लगायतको उपस्थिति रहेको थियो ।

कार्यक्रममा वडापालिका डकमकका प्रधानसम्पादक दिल्ली आचार्यले स्थानीय सरकारले मिडिया सम्बन्धी गरिरहेका अभ्यास र अब गर्नुपर्ने विषय समेटिएको एक कार्यपत्र प्रस्तुत गरेका थिए ।

कार्यक्रमका सहभागीहरुले स्थानीय सरकारले मिडिया नीति बनाएर अघि बढ्नुपर्ने, नगरपालिकाको काम कारबाही पारदर्शी र सेवाग्राहीमुखी हुुनुपर्ने, सञ्चार नीति बनाउँदा स्थानीय मिडियालाई प्राथमिकता दिनुपर्ने लगायतका विषय उठाएका छन् ।