काठमाडौँ । दोलखाको शैलुङ गाउँपालिकाले अस्त व्यस्त रहेका सडक निर्माणको कार्यलाई पहिलो प्रथामिकता दिएको छ । मुडेदेखि गाउँपालिका कार्यालय केन्द्र, ढुंगे हुँदै शैलुङ पुग्ने सडक खण्ड निर्माणको योजना बनेको हो ।

गाँउपालिका कार्यालय पुग्ने सडक खण्ड लगायत अन्य सडक हिउँदको समयमा धुलाल्मे र वर्षायममा हिलाम्मे हुने गरेको छ । निर्माण कम्पनीको लापरवाहीका कारण सडक अलपत्र परेको छ । मुडेदेखी ढुंगेसम्म १६ किलोमिटर सडक काम नगरी निर्माण कम्पनीले अलपत्र पारेर छाडेका कारण तत्काल सडकको कामका लागि कार्यदल बनाएको गाउँपालिका अध्यक्ष रिमल बाबु श्रेष्ठले बागमती पेजलाई बताए ।

१६ किलोमिटर सडक कालोपत्रे गर्ने गरी भौतिक पूर्वाधार कार्यालय सिन्धुपाल्चोकले ३१ करोड ७५ लाख रुपैयाँमा महालक्ष्मी निर्माण, द कञ्चनजंगा र शुभकामना जेभीसंग दुई वर्षमा काम पुरा गर्ने गरी २०७६ साल असारमा सम्झौता गरिएको थियो । तर अहिलेसम्म सडकको अवस्था जस्ताको तस्तै रहेको र निर्माण कम्पनीलाई सम्पर्क गर्दा काम पुरा गर्छौ भन्दै टार्ने गरेको र फोन नै अफ हुने गरेको समेत अध्यक्ष श्रेष्ठको भनाई छ ।

पालिकाको मुख्य समस्या सडक निर्माण भएकाले यस कामका लागि पटक पटक बैठक बसेको श्रेष्ठले बताए । उनले भने, ‘गाउँपालिका देखी भैँसे डाँडा सम्म १० किलामिटरको टेण्डर लागिसकेको छ, त्यसको काम यहि दशैँ आसपासमा सुरु हुने छ । ढुंगे देखी कालापानी आसपासको सडकको लागि ८ कारोडको बजेट विनियोजन भइसकेको छ ।’

मुडे देउराली सडक खण्डमा सवारी चल्न थालेको २२ वर्ष पुगेको छ । तर पालिका भित्रका कतिपय सडक अस्त व्यस्त रहेका छन् । शैलुङ गाउँपालिका पर्यटकिय क्षेत्र भएका कारण आन्तरीक तथा बाह्य पर्यटकहरुका लागि आवत जावतमा सहज बनाउनका निमित्त पनि सडकको काम छिट्टै सम्पन्न गर्ने अध्यक्ष श्रेष्ठले जानकारी दिएका छन् ।