सुर्खेत – सबै विद्यार्थी केही बोल्न नसक्ने र केही सुन्न नसक्ने छन्। जहाँ अन्य विद्यालयभन्दा फरक तरिकाले पढाउनुपर्छ। १० कक्षासम्मको विद्यालयमा ९६ जना विद्यार्थी छन्। विद्यालयमा अध्ययनरत सबै विद्यार्थीलाई सांकेतिक भाषामै पढाउनुपर्छ।

त्यसैले पनि शिक्षकले हात र मुखको इशारा गरेर ती बालबालिकालाई अध्यापन गराउनुपर्छ। सुन्ने र बोल्ने क्षमता नभएका बालबालिकाको शैक्षिक केन्द्रका रूपमा रहेको विद्यालय हो, कर्णाली प्रदेशको राजधानी वीरेन्द्रनगरस्थित सिद्ध बहिरा बाल स्कुल।

विद्यालयमा कार्यरत १० शिक्षकमध्ये ६ जना विशेष शिक्षा परिषद्बाट नियुक्त भएका छन् भने विद्यालयमा चार जना हेरचाहकर्ता र तीन जना कार्यालय सहयोगी छन्। कुल ९६ जना अध्ययनरत विद्यालयमा ८१ जना बालबालिकाले आवासीय सुविधासहितको शिक्षा लिइरहेका छन्।

विद्यालयमा विषयगत संकेत सामग्रीको अभावका कारण सुन्ने र बोल्ने क्षमता नभएका विद्यार्थीको पठनपाठनमा समस्या भइरहेको छ। ‘साना कक्षामा सांकेतिक संकेत अभावले खासै समस्या हुँदैन’, प्रध्यानाध्यापक चिन्तामणि कँडेल भन्छन्, ‘खासगरी पठनपाठनमा प्रयोग हुने सांकेतिक संकेत अभावले माथिल्लो कक्षाका विद्यार्थी भने प्रभावित बन्ने गरेका छन्।’

विद्यालयमा गणित, विज्ञान, वातावरण शिक्षालगायत विषयमा शिक्षकलाई अध्यापनमा समस्या हुन्छ। कक्षा १० सम्म अध्यापन गराइरहेका शिक्षकमा विषयगत संकेत अभाव देखिने प्रधानाध्यापक कँडेल बताउँछन्।

उनी भन्छन्, ‘संकेत अभावले गर्दा शिक्षकले बुझाउन खोजेको शब्द विद्यार्थीले प्रस्ट बुझ्दैनन् अथवा बुझाइएको शब्दले अर्को अर्थ लगाउन सक्ने जोखिम हुन्छ। विषयगत संकेत अभावले विद्यार्थीलाई प्रस्ट अर्थ जनाउन शिक्षकलाई गाह्रो पर्छ।’

कँडेलका अनुसार नेपालमा विषयगत संकेतका लागि कार्यक्रम सञ्चालन तथा अध्ययन अनुसन्धान सुरु नभएको मात्र होइन, विषयगत संकेतका विषयमा नेपालमा पुस्तक पनि अभाव छ। अन्य मुलुकमा विषयगत संकेतको व्यवस्था गरिए पनि नेपालमा भने अन्य मुलुकको संकेतले काम गर्दैन।

‘पुराना शिक्षकलाई विज्ञान विषय अध्यापन गराउँदा समस्या उत्पन्न हुन्छ। यस विषयमा हामी शिक्षकले प्रयास पनि गरेका छौँ,’ उनले भने, ‘सांकेतिक भाषाका लागि तालिम सञ्चालन गरेका थियौँ। शिक्षकलाई विषयगत संकेतका लागि थप तालिम आवश्यक छ।’

सुन्न र बोल्न नसक्ने बालबालिकाको शैक्षिक केन्द्रका रूपमा स्थापित विद्यालय आफैँले सधैँ अभाव खेप्नुपरेको उनले बताए। ०३७ मा स्थापना भएको यस विद्यालयको भवन जीर्ण छ। कक्षा कोठा पनि पर्याप्त छैन भने यहाँ खेल मैदान, पाठ्यपुस्तक, शैक्षिक सामग्री र शिक्षकको पनि अभाव छ।

उचित स्रोतसाधन र अपर्याप्त शिक्षक दरबन्दीका कारण विद्यालयको शैक्षिकस्तर माथि उठाउन समस्या भएको प्रअ कँडेलले बताए।

यस विद्यालयमा प्राथमिक तहमा एक, निम्न माध्यमिक तहमा चार र माध्यमिक तहमा एक जना गरी ६ जनाको दरबन्दी छ।

विद्यालयमा कम्तीमा नौ जना शिक्षक आवश्यक रहेको प्रअ कँडेलको भनाइ छ। उनी अन्य विद्यालयका शिक्षकसरह यहाँका शिक्षकलाई सेवा–सुविधा नभएको बताउँछन्।

वीरेन्द्रनगरमा रहेको यो विद्यालय अहिले सुन्ने र बोल्ने क्षमता नभएका बालबालिका अध्ययन गर्न एउटा मात्र विद्यालयका रूपमा छ।

सुर्खेतका बड्डीचौर, मालारानी र गुमीमा रहेको यस्ता प्रकृतिका विद्यालय गाभेर यही विद्यालयमा ल्याइएको हो। अहिले पनि यो विद्यालय संघीय सरकारकै स्वामित्वमा छ।

विद्यालयको नौ कोठे भवनभित्र एउटा कोठामा कार्यालय सञ्चालित छ भने बाँकी कोठामा पठनपाठन हुने गर्छ।
‘पानी पर्दा सबै कक्षा चुहिएर पोखरी बन्छन्, गर्मीमा सिधै सूर्यको प्रकाश कोठाभित्रै छिर्छ,’ प्रअ कँडेल भन्छन्, ‘शौचालय जीर्ण अवस्थामा छ भने खानेपानीको व्यवस्था नहुँदा विद्यार्थीलाई पसलबाट किनेर ल्याउनुपर्छ।’

विशेष शिक्षामार्फत सञ्चालन भएको विद्यालयमा बहिरा विद्यार्थीलाई पढाउने शैक्षिक सामग्री नहुँदा अध्यापनमा समस्या परेको अंग्रेजी शिक्षक रमेशकुमार कार्कीले बताए।

सांकेतिक भाषाका लागि आवश्यक सामग्री नहुँदा पठनपाठनमा समस्या रहेको उनको भनाइ छ। उनका अनुसार नेपालीमा अनुवाद गरी फेरि सांकेतिक रूपमा बुझाउन गाह्रो हुन्छ। सम्बन्धित विभागले नै पाठ्यक्रमअनुसार सांकेतिक संकेत वा चिह्नको विकास तथा अनुसन्धानमा ध्यान दिनुपर्ने उनको धारणा छ।

श्रवण शक्ति नभएका विद्यार्थीका लागि अध्ययन गर्ने प्रदेशकै एक मात्र विद्यालय भएकाले पनि यहाँ विद्यार्थी आउने क्रम बढ्दो छ। आर्थिक अवस्था र पूर्वाधार नहुँदा विद्यालयमा दिनहुँ समस्या हुने गर्छ।

प्रधानाध्यापक कँडेलका अनुसार वीरेन्द्रनगर नगरपालिकाले गत आर्थिक वर्षमा नयाँ भवनका लागि दिएको ५० लाख रुपैयाँले अहिले भवन बनिरहेको छ।

जीर्ण रहेको प्रदेशकै एक मात्र बहिरा स्कुलको पूर्वाधार तथा शैक्षिक गुणस्तर विकासमा कुनै जनप्रतिनिधिको ध्यान नपुगेको अभिभावकको गुनासो छ।

विद्यालयमा अध्ययनरत विद्यार्थीका लागि शैक्षिक सामग्री खरिद गर्न सरकारले प्रतिविद्यार्थी मासिक ५ सय रुपैयाँ उपलब्ध गराउँदै आएको छ। विद्यालयमा हाल सुर्खेत, दैलेख, कालिकोट, हुम्ला, डोल्पा, जाजरकोट, मुगु, सल्यान, बाँके, बर्दिया र कैलालीका विद्यार्थी अध्ययनरत छन्।

कुल ९६ जना विद्यार्थी अध्ययनरत सिद्ध बहिरा बाल स्कुलमा ४६ छात्रा र ५० छात्र छन्। यहाँ पाँच छात्र र नौ छात्रा गरी १४ दलित विद्यार्थी छन्।

विद्यालयमा ८१ जना आवासीय रुपमै अध्ययन गरिरहेका छन् भने १५ जना घरबाटै आवतजावत गर्छन्।

विद्यालयमा सबैभन्दा धेरै दैलेख जिल्लाका ३४ जना विद्यार्थी अध्ययनरत छन् भने सुर्खेतका २८, कालिकोटका १५, हुम्लाका १५, जाजरकोटका चार, कैलालीका तीन, अछामका तीन, डोल्पाका दुई तथा मुगु र डोटीका एक/एक जना विद्यार्थी अध्ययनरत छन्। रासस