काठमाडौं — नेपालमा सफ्टवेयर परीक्षण र गुणस्तर सुनिश्चितता क्षेत्रलाई अन्तर्राष्ट्रिय स्तरमा चिनाउने उद्देश्यका साथ Nepal Software Testing Qualifications Board (एनएसटिक्युबी) ले एनएसटिक्युबी एसेन्ड २०२६ नामक भव्य गुणस्तर सम्मेलन आयोजना गर्ने भएको छ। “सफ्टवेयर परीक्षणमा उकास, परिष्कार र नेतृत्व” भन्ने मूल नारासहित आयोजना हुने यो सम्मेलन फेब्रुअरी २१, २०२६ मा सम्पन्न हुनेछ। सम्मेलनले नेपालका विद्यार्थी, नवप्रवेशी टेस्टर, अनुभवी गुणस्तर विज्ञ, प्रविधि नेतृत्वकर्ता तथा उद्योग प्रतिनिधिहरूलाई एउटै मञ्चमा ल्याउने लक्ष्य राखेको छ।
यो सम्मेलन नेपालमा गुणस्तरमैत्री प्रविधि संस्कृतिको विकासका लागि कोसेढुंगा सावित हुने अपेक्षा गरिएको छ। कार्यक्रममा सफ्टवेयर परीक्षणको भविष्य, गुणस्तर इन्जिनियरिङ, स्वचालित परीक्षण, कृत्रिम बुद्धिमत्ता आधारित परीक्षण, परीक्षण प्रक्रिया सुधार, करियर विकास तथा अन्तर्राष्ट्रिय प्रमाणिकरणका विषयमा गहन छलफल हुनेछन्। अन्तर्राष्ट्रिय स्तरका ख्यातिप्राप्त वक्ताहरूले आफ्ना अनुभव र व्यवहारिक ज्ञान साझा गर्ने भएकाले सहभागीहरूले विश्वस्तरीय अभ्यासबारे प्रत्यक्ष रूपमा बुझ्ने अवसर पाउनेछन्।
सम्मेलनको मुख्य आकर्षणका रूपमा करियर निर्माण र पेशागत पहिचान, स्वचालित परीक्षणमा लगानीको वास्तविक मूल्याङ्कन, परीक्षण पेशामा महिलाको भूमिका, भविष्यमा आवश्यक सीपहरू तथा गुणस्तर परिपक्वता मोडेलजस्ता विषय समेटिएका छन्। साथै, अन्तर्राष्ट्रिय प्रमाणिकरणसम्बन्धी खुला प्रश्नोत्तर सत्रमार्फत सहभागीहरूले आफ्नो करियर मार्ग स्पष्ट पार्ने अवसर पाउनेछन्। आयोजकका अनुसार, यसले नेपालका सफ्टवेयर टेस्टरहरूलाई केवल कार्यान्वयनकर्ताबाट गुणस्तर नेतृत्वकर्तामा रूपान्तरण गर्न सहयोग पुर्‍याउनेछ।
एनएसटिक्युबी एसेन्ड २०२६ केवल एक सम्मेलन मात्र नभई नेपाललाई विश्वस्तरीय गुणस्तर केन्द्रको रूपमा स्थापित गर्ने दीर्घकालीन अभियानको हिस्सा हो। सम्मेलनमार्फत सहभागीहरूले ज्ञान, सञ्जाल र आत्मविश्वास आर्जन गरी अन्तर्राष्ट्रिय स्तरमा प्रतिस्पर्धा गर्न सक्षम हुने विश्वास आयोजकले व्यक्त गरेका छन्। प्रविधि क्षेत्रमा गुणस्तरलाई प्राथमिकतामा राख्दै नेपाललाई विश्व बजारमा चिनाउने दिशामा यो सम्मेलन महत्वपूर्ण कदमका रूपमा हेरिएको छ।