चितवन । बागमती प्रदेशका मुख्यमन्त्री अष्टलक्ष्मी शाक्यले प्रदेश सरकारका मातहतमा रहेका अस्पतालाई प्रभावकारी सेवा दिन आग्रह गरेकी छन्।

पूर्वी चितवनस्थित बकुल्लहर रत्ननगर अस्पतालमा आयोजित पिसिआर ल्याब र अक्सिजन प्लान्टको शुभारम्भ गर्दै उनले अस्पताललई थप श्रोत साधन सहयोग गरिने जानकारी समेत दिइन् ।

स्वास्थ्य क्षेत्रमा सुधारको आवश्यक देखिएपछि सरकारले स्वास्थ्य मन्त्रालयलाई अलग बनाएको उनको भनाइ छ ।

त्यसैगरी बागमती प्रदेशका स्वास्थ्यमन्त्री प्रदीपकुमार कटुवालले विश्व महामारीको रुपमा फैलिएको कोभिडलाई मध्यनजर गर्दै विभिन्न कामहरु गर्ने योजना रहेको बताए । रत्ननगर अस्पतालमा पिसिआर ल्याब र अक्सिजन प्लान्टको शुभारम्भ गर्दै आगामी दिनमा स्वास्थ्य सम्बन्धी आवश्यक थप सामाग्री ल्याउन सक्दो पहल गर्ने धारणा व्यक्त गरे ।

अस्पताल सञ्चालक समितिका अध्यक्ष गोपाल कर्माचार्यका अध्यक्षतामा सम्पन्न कार्यक्रममा, सामाजिक विकासमन्त्री विजय सुवेदी, पूर्व शिक्षा राज्यमन्त्री शेषनाथ अधिकारी, पूर्व कृषि, सहकारी तथा भूमि व्यवस्थामन्त्री दावा दोर्जे लामा, रत्ननगर नगरपालिकाका प्रमुख नारायण वन लगायतको उपस्थिति रहेको थियो ।