काठमाडौं । बूढानीलकण्ठ नगरपालिकामा नेकपा एमालेले आफ्नो बर्चस्व कायम राख्दै नगरप्रमुखमा मिठाराम अधिकारी र उपप्रमुखमा अनिता लामाले जित सुनिश्चित गरेका छन् ।

नगरप्रमुखमा निर्वाचित अधिकारीले नेपाली काँग्रेसका निकटतम प्रतिद्वन्दी बिनोद चालिसेलाई २७३८ मतको फराकिलो मतान्तरले पराजित गरेका छन् भने उपप्रमुखमा पनि अनिता लामाले नेपाली काँग्रेसकै उम्मेद्वार रमिला वाग्लेलाई २३४२ मतले पराजित गरेका हुन् ।

नगरप्रमुखमा १४२५० मत प्राप्त गर्दै मिठाराम अधिकारी विजयी हुँदा उनकाप्रतिद्वन्दी विनोद चालिसेले जम्मा ११५१२ मत प्राप्त गरेका छन् । उपप्रमुखमा १४३१४ मतले अनिता लामा विजयी हुँदा काँग्रेसकी रमिला वाग्ले ११९७२ मतका साथ उपविजेता बनिन् ।

बूढानीलकण्ठका १३ वडामध्ये १० वडामा नेकपा एमाले विजयी भएको छ भने दुईवटामा नेपाली काँग्रेस र एउटामा स्वतन्त्रले जित हासिल गरेको छ । बूढानीलकण्ठ–१, ७, ८, १०, १२ र १३ मा नेकपा एमालेले शतप्रतिशत नतिजा हासिल गर्न सफल भएको छ । त्यस्तै वडा नं. २, ६, ९ र ११ को अध्यक्षमा आफ्नो दावेदारी कायम गरेको छ ।