Logo

भवानी कार्की

असार २६, २०७९ आईतबार

सबैको रोजाइको गन्तव्य, कालिन्चोक भगवती


काठमाडौँ । दोलखाको कालिन्चोक गाउँपालिकामा पर्ने कालिन्चोक भगवती मन्दिर सबैको प्रिय गन्तव्य बनेको छ । कालिन्चोक भगवती आसपासको मनोरम दृश्यले जो कोहीलाई पनि मोहित बनाएको हो । कालिन्चोक आफैमा प्राकृतीक तथा धार्मिक बर दान हुन् । त्यसैले पनि एक पटक त्यहाँ पुगेका जो कोही मानिस पटक पटक पुग्ने विश्वास लिएर फर्कन्छन् ।

विगत केही वर्ष अघि देखी कालिन्चोकमा आन्तरिक तथा बाह्य पर्यटकको बाक्लो उपस्थिति भएको पाइन्छ । बर्खाको सिजनमा पानी पर्ने र कुहिरो लाग्ने हुँदा मौसम खुलेको बेला मात्र त्यहाँको मनोरम दृश्य देख्न सकिन्छ तर हिउँदको समयमा भने सेता हिमाल सँगै प्राकृतिक सौन्दर्यले भरिपूर्ण भएको दृश्य अवलोकन गर्न पाइन्छ । हिमालकै समीपमा उभिएको महसुस हुँदा कसको मन नरमाउला हो त्यहाँ पुग्दा हिमालकै छेउमा उभिएको आभास गर्न सकिन्छ । त्यसैले पनि कलिञ्चोक घुम्न जानेको लर्को छ । 

मानिसहरू भगवतीको दर्शन सँगै त्यहाँको सौन्दर्यमा रमाउनका लागी नै कालिन्चोक पुग्ने गरेका छन् । समुद्र सतहबाट ३ हजार ८ सय ४२ मिटर उचाइमा रहेको यस ठाउँ सदरमुकाम चरिकोटबाट ६ घण्टा पैदल हिँड्दा पुगिन्छ । तर केही वर्ष देखी नै मोटर गाडी मन्दिर छेउमै पुगी सकेको छ । मन्दिरको डाँडामा पुग्न केबुलकारको व्यवस्थाको साथै बस्नका लागि राम्रा राम्रा होटेल तथा लजको समेत राम्रो व्यवस्था रहेको छ । 

कालिन्चोक पुग्दा स्वर्गको एक टुक्रामा पुगेको अनुभूति हुने त्यहाँ पुग्ने भक्तजन बताउँछन् । सबै जाति तथा भाषा भाषी रहेको यस ठाउँमा बेला बेला सँस्कृतीक महोत्सव तथा चौरी महोत्सव पनि हुने गर्दछ । राजधानी काठमाडौँबाट केही घण्टाको यत्रामा पुगिने भएकाले कालिन्चोक भगवतीलाई नजिकको तीर्थ पनि भन्ने गरिन्छ ।

कालिन्चोक भगवती, काब्रेको पलान्चोक भगवती, काठमाडौँमा शोभा भगवती तथा अन्य भगवती गरी सात दिदी बहिनी हुन भन्ने किंवदन्ती रहेको छ । धार्मिक मान्यता अनुसार कलिञ्चोक भगवतीको दर्शन गर्नाले मनले चिताएको पुग्ने जनविश्वास रहेको छ । कालिन्चोक भगवतीमा विशेष गरी जनैपुर्णीमा, चैते दसैँ, दसैँ लगायत अन्य पर्वमा विशेष मेला लग्ने र पूजा हुने गर्दछ ।