Logo

बागमती पेज

श्रावण १६, २०७९ सोमबार

सुनको मूल्यमा भारी गिरावट, तोलाको कति पुग्यो ?


काठमाडौं । आज (सोमबार) नेपाली बजारमा (सुन)को मूल्य घटेको छ। नेपाल सुनचाँदी व्यवसायी महासंघका अनुसार सोमबार सुनको मूल्य तोलामा ४०० रुपैयाँले घटेको हो।

तोलामा ४०० रुपैयाँले घटेपछि सोमबार नेपाली बजारमा छापावाल सुनको मूल्य प्रतितोला ९५ हजार ४०० रुपैयाँ कायम भएको छ। यस्तै, तेजाबी सुनको मूल्य ९४ हजार ९०० कायम भएको छ।

साप्ताहिक कारोबारको पहिलो दिन (आइतबार) भने सुनको मूल्य तोलामा २०० रुपैयाँले बढेको थियो। आइतबार छापावाल सुन प्रतितोला ९५ हजार ८०० र तेजाबी सुन ९५ हजार ३०० रुपैयाँ प्रतितोलामा कारोबार भएको थियो।

सोमबार चाँदीको मूल्य पनि तोलामा १० रुपैयाँले घटेर प्रतितोला १ हजार २३० रुपैयाँ घटेको छ। आइतबार भने तोलामा १० रुपैयाँ बढेर चाँदी प्रतितोला १ हजार २३० रुपैयाँमा कारोबार भएको थियो।

नेपालमा सुनचाँदी व्यवसायी संघले सुनको मूल्य निर्धारण गर्छ । र, सोही अनुसार बजारमा कारोबार हुन्छ । सुनचाँदी व्यवसायी संघका पूर्व अध्यक्ष मणिकरत्न शाक्यका अनुसार नेपालमा सुनको मूल्य निर्धारणका लागि पहिले न्यूयोर्क एक्चेञ्ज अर्थात अन्तर्राष्ट्रिय बजारको कारोबार दरलाई आधार लिइन्छ ।

उनका अनुसार मूल्य निर्धारण गर्नुअघि नेपालको समयअनुसार बिहान १० बजे संघमा न्युयोर्क मार्केटको बजार मूल्य आइसकेको हुन्छ । साथै भारत र दुबईको मूल्य प्रवृत्तिलाई पनि आधार मानेर मूल्य निर्धारण गर्दछ ।

त्यसैगरी, नेपाल राष्ट्र बैंकले तोकेको विदेशी विनिमय दर अर्थात् डलरको मूल्यको आधारमा निर्धारण हुन्छ । सुनको मुख्य मूल्य आधार भनेको नै अन्तर्राष्ट्रिय बजारमा सुनको मूल्य र राष्ट्र बैंकको विनिमय दर रहेको शाक्यले बताए ।

यसका साथै अन्य खर्चमा भन्सार, ह्यान्डलिङ शुल्क र मुनाफा जोडिन्छ । जसमा मुनाफा ०.५ प्रतिशत आयातकर्ता बैंकले र ०.५ प्रतिशत सुनचाँदी व्यवसायीले राख्ने गरेको शाक्यको भनाइ छ । यसरी कायम हुन आएको सुनको मूल्य नै सो दिनको कारोबारका लागि निर्धारण गरिन्छ ।