मेलम्चीको बाढीले हेलम्बु गाउँपालिका-४ ग्याल्थुमका चार घर उच्च जोखिममा परेका छन्।

लगातारको वर्षाका कारण शुक्रबार बिहानैदेखि मेलम्चीले कटान सुरू गरेपछि ग्याल्थोममा भरतबहादुर कार्की, मुक्तिनाथ लामिछाने, छविरमन लामिछाने र सुरेश तामाङका घर उच्च जोखिममा परेको वडाध्यक्ष बुद्धिमान तामाङले जानकारी दिए।

मेलम्चीमा बाढी आएपछि ग्याल्थोम बस्तीका स्थानीयहरू टहरामा सर्न थालेका छन्। यसअघि ०७८ मा मेलम्चीमा आएको बाढी बस्तीमा पसेपछि सरकारले सुरक्षित स्थानमा टहरा बनाइदिएको थियो। टहरा बनाए पनि ३०/३५ परिवार बस्तीमै बसिरहेको वडाध्यक्ष तामाङले बताए।

ग्यालथुमकै सरस्वती माध्यमिक विद्यालय पनि बाढीको उच्च जोखिममा छ। बाढीले बिहानै विद्यालयको शौचालय र निर्माणाधीन भागको पिलर बगाएको थियो। अहिले ठूलो भवनको पिलरले बाढी थेगिरहेको वडाध्यक्ष तामाङले जानकारी दिए।

विद्यालयकै टिएलसी भवन खस्नै लागेको अवस्थामा छ। बाढीको जोखिममा परेपछि आज विद्यालय बन्द गरिएको छ। विद्यालयमा भएका डेस्क, बेन्चलगायत सामान बिहानै जनप्रतिनिधि र प्रहरी मिलेर हटाइसकेका छन्।