जाडोयाममा चिसोका कारण हुने समस्यामध्ये एक हो हाइपोथर्मिया । शरीरको तापक्रम घट्दै जाने समस्यालाई हाइपोथर्मिया भनिन्छ । जस्तै, मानिसको सामान्य तापक्रम ९८ दशमलj ४ डिग्री फरेनहाइड हुन्छ, त्यो तापक्रम छिटोछिटो घट्दै गएमा हाइपोथर्मिया भएको भनिन्छ ।

विशेषगरी यसले वृद्धवृद्धा, बालबालिका र कमजोर मान्छेलाई सताउँछ । यस्तै हिमाली क्षेत्रमा र शीतलहर चल्ने ठाउँमा बस्ने मानिस हाइपोथर्मियाको सिकार हुन सक्छन् । धेरै रक्सी पिउने, बाइक चलाउने, राति काम गर्ने र चिसोमा पातलो लुगा लगाएर काम गर्ने व्यक्तिलाई हाइपोथर्मिया हुने सम्भावना बढी हुन्छ ।

कसरी पहिचान गर्ने ?

हाइपोथर्मियालाई तीन प्रकारमा विभाजन गर्न सकिन्छ- सामान्य, मध्यम र गम्भीर ।

सामान्य हाइपोथर्मियामा ९० देखि ९५ डिग्री फरेनहाइट अर्थात् (३२ देखि ३५ डिग्री सेल्सियस) तापक्रम हुन्छ । मध्यममा ८२ देखि ९० डिग्री फरेनहाइट अर्थात् (२८ देखि ३२ डिग्री सेल्सियस) हुन्छ भने ६८ देखि ८२ डिग्री फरेनहाइट अर्थात् (२० देखि २८ डिग्री सेल्सियस) भएमा गम्भीर समस्या मानिन्छ ।

जति धेरै शरीरको तापक्रम कम हुन्छ त्यति नै जोखिम बढी हुन्छ ।

जोखिम

शरीरमा चाहिनेभन्दा पनि कम तापक्रम भएर, शरीरमा रक्तसञ्चार कमी भएर, मुटुको काम गर्ने क्षमता भएर, कठ्यांग्रिएर मानिसको मृत्यु हुन सक्छ । धेरै रक्सी खाने, बाटोमा सुत्ने मानिसलाई हाइपोथर्मियाको जोखिम उच्च हुन्छ ।