न्यु मिलेनियम एकेडेमीमा शिक्षकहरूका लागि ‘आर्ट अफ लिभिङ’ ह्याप्पिनेस कोर्स सफल
काठमाडौँ — न्यु मिलेनियम एकेडेमीमा ‘आर्ट अफ लिभिङ’ संस्थाको सहकार्यमा सञ्चालन गरिएको शिक्षकहरूका लागि ह्याप्पिनेस कोर्स सफलतापूर्वक सम्पन्न भएको छ।
वरिष्ठ आर्ट अफ लिभिङ शिक्षिका दाम्यन्ती रायमाझीको नेतृत्वमा सम्पन्न उक्त कार्यक्रममा विद्यालयका सम्पूर्ण शिक्षक–शिक्षिकाहरू सहभागी भएका थिए। कार्यक्रममा शिक्षकहरूको मानसिक सन्तुलन, तनाव व्यवस्थापन, सकारात्मक सोच र आत्मविकासलाई केन्द्रमा राखिएको थियो।
कार्यक्रम समापनपछि प्रतिक्रिया दिँदै विद्यालयका प्रधानाध्यापक नारायण चौलागाईंले भने,
“गुणस्तरीय शिक्षा दिन शिक्षक आफैँ मानसिक रूपमा सशक्त र सन्तुलित हुन जरुरी छ। आर्ट अफ लिभिङको यो ह्याप्पिनेस कोर्सले हाम्रो शिक्षक टोलीलाई नयाँ ऊर्जा, स्पष्टता र सकारात्मकता दिएको छ। यस्तो कार्यक्रम शिक्षण पेशामा अत्यन्त आवश्यक छ।”
कार्यक्रममा सहभागी अन्य शिक्षकहरूले पनि कोर्सपछि कार्यप्रतिको उत्साह बढेको, तनाव कम भएको र कक्षाकोठामा धैर्य तथा सकारात्मक व्यवहारमा सुधार आएको अनुभव साझा गरेका छन्। एक शिक्षकले भने,
“हामीभित्रको शान्ति बढेपछि विद्यालयको समग्र वातावरणमै सकारात्मक परिवर्तन महसुस भएको छ।”
यसैगरी, आर्ट अफ लिभिङकी वरिष्ठ शिक्षिका दाम्यन्ती रायमाझीले आफ्नो मन्तव्यमा भनिन्,
“शिक्षक सशक्त भए विद्यालय सशक्त बन्छ। न्यु मिलेनियम एकेडेमीले सम्पूर्ण शिक्षकलाई समेटेर ह्याप्पिनेस कोर्स सञ्चालन गर्नु सराहनीय र प्रेरणादायी कदम हो।”
विद्यालय प्रशासनले आगामी दिनहरूमा पनि शिक्षकहरूको मानसिक स्वास्थ्य र व्यक्तित्व विकाससँग सम्बन्धित यस्ता कार्यक्रमहरूलाई निरन्तरता दिने प्रतिबद्धता व्यक्त गरेको छ।