काठमाडौं । नेपाली कांग्रेसका नेता तथा पूर्व स्वास्थ्य मन्त्री गगन थापाले प्लाज्मा दान गर्ने भएका छन् । कोरोना संक्रमण भएर निको भएका व्यक्तिको प्लाज्मा जटिल अवस्थामा पुगेका कोरोनाका विरामीको उपचारमा सघाउ पुग्छ । कोरोना संक्रमितको उपचारमा प्लाज्मा थेरापी प्रभावकारी देएिकाले प्लाज्मा दान गर्ने निर्णय गरेको उनले बताए ।

थापासहित उनकी पत्नी अन्जना के.सी.ले पनि प्लाज्मा दान गर्ने निर्णय गरेको जनाएका छन् । थापा दम्पत्ति कोरोना संक्रमण भएर केही दिन अघि उनीहरुको रिपोर्ट नेगेटिभ आएको छ ।

कोरोना संक्रमितको उपचारमा सहयोग पुगोस भनेर कांग्रेसका अर्का नेता प्रदिप पौडेलले सुरु गरेको प्लाज्मा एप्समा आफ्नो नाम दर्ता गरेको सामाजिक सञ्जालबाट जानकारी दिएका छन् । रक्तदान जीवनदान भन्ने नारालाई सघाउ पु¥याउन पौडेलले एप्स सुरु गरेका छन् ।

कोरोना मुक्त भएकाले प्लाज्मा दिन चाहे उक्त एप्समा नाम दर्ता गर्न सक्छन् । त्यहाँबाट सम्पर्क गरेर प्लाज्मा आवश्यक पर्ने विरामीले लिन सक्छन् ।

के हो प्लाज्मा थेरापी?
भाइरोलोजिस्ट डा. लुना भट्ट शर्माका अनुसार कन्भालेसेन्ट प्लाज्मा थेरापी एक प्रकारको ’प्यासिभ एन्टीबडी थेरापी’ हो “प्यासिभ एन्टीबडी थेरापी भनेको एक व्यक्तिमा बनिसकेको एन्टीबडी अर्को व्यक्तिलाई दिनु हो । अरू रोगमा पनि तत्काल उपचार गर्ने क्रममा यो विधि अपनाइन्छ।“ नेपाल स्वास्थ्य अनुसन्धान परिषद्का सदस्य सचिव डा. प्रदीप ज्ञवालीका अनुसार निको भएका व्यक्तिबाट एन्टीबडी झिकेर आईसीयूमा बस्नुपर्ने र गम्भीर प्रकृतिका बिरामीलाई दिइन्छ। “सरल भाषामा भन्नुपर्दा यो एक व्यक्तिबाट अर्को व्यक्तिमा रगत दिइने जस्तै हो,“ उनी थप्छन् ।