विश्व ध्यान दिवसको अवसरमा समाजसेवी कृष्ण तामाङको पहलमा विशेष ध्यान सत्र सम्पन्न

काठमाडौँ । विश्व ध्यान दिवस (World Meditation Day) को अवसर पारेर समाजसेवी तथा राजनीतिज्ञ कृष्ण तामाङको विशेष पहलमा एक घण्टा लामो ध्यान तथा योग सत्र भव्य रूपमा सम्पन्न भएको छ। मानसिक शान्ति, सुस्वास्थ्य र सकारात्मक सोचको विकास गर्ने उद्देश्यले आयोजित उक्त कार्यक्रममा ‘आर्ट अफ लिभिङ’ की वरिष्ठ प्रशिक्षक रमा रायमाझीले सहजीकरण गर्नुभएको थियो।

कार्यक्रमलाई सम्बोधन गर्दै आयोजक तथा समाजसेवी कृष्ण तामाङले वर्तमान समयमा मानिसहरूमा बढ्दै गएको तनाव, भागदौड र मानसिक बोझलाई कम गर्न ध्यानको विकल्प नभएको बताउनुभयो। उहाँले राजनीति र समाजसेवा केवल भौतिक विकासमा मात्र सीमित नभई नागरिकको मानसिक र आत्मिक विकासमा पनि केन्द्रित हुनुपर्ने धारणा व्यक्त गर्नुभयो। तामाङका अनुसार, समाजलाई सही दिशामा डोऱ्याउन प्रत्येक व्यक्ति मानसिक रूपमा स्वस्थ र शान्त रहनु आवश्यक छ, जसका लागि ध्यान नै सबैभन्दा प्रभावकारी माध्यम हो।

एक घण्टासम्म चलेको उक्त ध्यान सत्रमा प्रशिक्षक रमा रायमाझीले ध्यानका विभिन्न विधि, प्राणायम र श्वासप्रश्वासका प्रविधिहरूको बारेमा अभ्यास गराउनुभएको थियो। उहाँले आर्ट अफ लिभिङका सूत्रहरूलाई उल्लेख गर्दै ध्यानले कसरी शरीरमा ऊर्जा भर्ने र मनलाई वर्तमान क्षणमा राख्न मद्दत गर्छ भन्ने विषयमा प्रकाश पार्नुभयो। रायमाझीले दैनिक जीवनमा कम्तीमा केही समय ध्यानका लागि छुट्याउन सके जीवनमा ठुलो रूपान्तरण आउने बताउँदै विश्व ध्यान दिवसको महत्वमाथि चर्चा गर्नुभयो।

विश्व ध्यान दिवसलाई विशेष प्राथमिकताका साथ मनाइएको यस कार्यक्रमले सहभागीहरूमा नयाँ ऊर्जा र उत्साह थपेको थियो। कार्यक्रमको अन्त्यमा सहभागीहरूले यस्ता जीवनोपयोगी सत्रहरूले व्यक्तिगत कार्यक्षमता र सामाजिक सद्भाव बढाउन मद्दत पुग्ने भन्दै आयोजकप्रति आभार प्रकट गरेका थिए। समाजसेवी कृष्ण तामाङले आगामी दिनमा पनि यस्ता जनचेतनामूलक र स्वास्थ्यवर्द्धक कार्यक्रमहरूलाई निरन्तरता दिने प्रतिबद्धता व्यक्त गर्नुभएको छ।