काठमाडौँ- नेपाल-चीन कूटनीतिक सम्बन्ध स्थापना आजदेखि ७० औँ वर्षमा प्रवेश गरेको छ । यस अवसरमा नेपाल र बेइजिङमा विविध कार्यक्रम आयोजना गरेर कूटनीतिक सम्बन्ध स्थापनाको वार्षिकोत्सव मनाइएको छ ।

अनौपचारिक रूपमा तिब्बतका राजा श्रोङचोङ गम्पोसँग राजकुमारी भृकुटीको विवाहपछि प्रारम्भ भएको ऐतिहासिक सम्बन्ध आधुनिक युगमा अझ झाङ्गिदै गएको छ ।

चीनसँग आज कै दिन अर्थात् १ अगष्ट १९५५ मा कूटनीतिक सम्बन्ध स्थापना भएको हो ।

शान्तिपूर्ण सह-अस्तित्व, पारस्परिक सहयोग, भौगोलिक अखण्डता र अहस्तक्षेप लगायत पञ्चशीलका सिद्धान्तमा आधारित नेपाल–चीन सम्बन्धलाई दुवै मुलुकले उच्च प्राथमिकता दिएका तथा यसलाई अझ सुदृढ तुल्याउन दुवै देशका शीर्ष नेतृत्व क्रियाशील रहेको कुटनीतिक जानकारहरुको भनाइ छ ।

विश्वशक्ति राष्ट्र बनेको चीनले हासिल गरेको विकासबाट अधिकभन्दा अधिक लाभ लिएर मुलुकलाई समृद्धिको दिशातर्फ अग्रसर गराउनुपर्ने सुझाव कुटनीतिक क्षेत्रको छ ।

यसै अवसरमा चीनीया दुतावासले काठमाडौंमा आज साँझ आयोजना गरेको विशेष समारोहमा प्रधानमन्त्री केपी शर्मा ओली सहभागी हुनु भएको छ ।

सो अबसरमा प्रधानमन्त्री केपी शर्मा ओलीले नेपाल र चीनबीचको ७० वर्षदेखिको सम्बन्ध र सहकार्यलाई थप सुदृढ र विस्तार गर्दै लैजाने बताउनुभएको छ ।

प्रधानमन्त्री ओलीले द्विपक्षीय हित,आपसी सहकार्य र सम्बन्धका विविध पक्षलाई थप मजबुत बनाउदै लैजाने उल्लेख गर्नुभयो ।

नेपालको विकासका क्षेत्रमा चीनले पुर्‍याएको सहयोगका लागि धन्यवाद दिनुहुँदै प्रधानमन्त्री ओलीले स्वास्थ्य,सडक,सूचना प्रविधि लगायतका पूर्वाधारको क्षेत्रमा चीनसँग थप सहकार्य हुने पनि बताउनुभयो ।।